Mir sy…

… weder Bärn-Burger no hei mir gärn Fast Food. Üse Songwriter u Frontmaa heisst eifach so… Mir mache Mundart-Songs jensyts vo abdroschte Phrase u zwanghaftem Humor. Nid hochglanz, mängisch ruch u öppe o chly verletzlich – «Mängisch zart u mängisch wild» – eso wie ds Läbe o. U vo däm kenne mir nid nume d'Schoggisyte, mir luege o gärn chly hinder d'Fassade. Dert, wo ds Glück echly Patina het aagsetzt u d'Rächnig nid schön ufgeit. Wüll ds Läbe isch mängisch win e Muggestich, u es tuet guet, we'd chly drann chasch chratze.

Musigstil? Irgendwo zwüsche de drei Egge Folk, Rock u Country, mängisch o chy jazzig, aber nie banal. Geng wieder sprängt e Akkord ds vertroute Schema u tuet e nöje Horizont uf. Songs, wo y de Ghörgäng u Hirnwindige blybe hange u nid so schnäll wieder verleide. Da druf sy mir stolz u ganz unbescheide.

Mir sy Bärner, Lozärner u Aargäuer, der Üebigsruum hei mir vo Olten nach Zollikofen verleit. U üses Album mit 12 Songs isch 2021 usecho – em Burger sys vierte. Es het viel Zyt gha zum ryffe…

U we's di no Wunder nimmt, wie mir heisse, voilà (nid vlnr):
Samuel Burger (Gsang, Gitarre)
Alex von Kiparski (Gitarre)
Stefan Küttel (Bass)
Armand Glauser (Schlagzüg)